Ano e medio de cárcere a dous acusados dunha malleira ás portas dunha discoteca de Benito Corbal
Por Natalia Puga
Os pontevedreses Gabriel P.M. e Francisco P.V. deberán cumplir ano e medio de prisión por darlle unha malleira a outro individuo no exterior dunha coñecida discoteca da rúa Benito Corbal propinándolle patadas e puñadas.
Os feitos ocorreron sobre as catro da madrugada do 23 de agosto de 2014 e foron a xuízo o pasado 24 de outubro. A vista non estivo exenta de polémica, pois tivo que suspenderse a primeira vez que foi sinalado porque un dos acusados, Francisco P.V., presentouse borracho na sala e non estaba en condicións de declarar.
A sentenza da Sección Segunda da Audiencia Provincial de Pontevedra decláraos responsables dun delito de lesións. Inicialmente a Fiscalía pedía que foran condenados a tres anos e medio de prisión, pero finalmente o maxistrado impúxolles ano e medio ao considerar que neste caso concorre a circunstancia atenuante de dilacións indebidas pola "longa tramitación do procedemento dende os feitos ata a realización da vista oral". A sentenza considera que esta tramitación de máis de tres anos, "non garda proporcionalidade coa ben cativa complexidade da presente causa".
Ambos os dous acusados deberán indemnizar, de xeito conxunto e solidario, ao mozo ao que agrediron con 10.280 euros e tamén terán que pagar ao Servizo Galego de Saúde os 8.77,73 euros que xerou a atención á vítima no sistema sanitario.
O maxistrado que asina a sentenza, Xosé Xoán Barreiro Prado, considera probado que os dous acusados mantiveron unha discusión co outro home no exterior da citada discoteca e, no transcurso da mesma, agredírono mediante puñadas e patadas en diversas partes do corpo.
Por mor desta agresión, o lesionado resultou con diversas contusións, traumatismo facial con fractura dos ósos propios do nariz, ferida no beizo superior, ferida no tórax e a perda dun dente e a mobilidade doutro que rematou por perder. Tardou en curar oito días, dos cales dous estivo incapacitado e réstanlle como secuelas unha cicatriz de dous centímetros na zona da boca, cinco cicatrices na parede torácica e a perda dos dous incisivos centrais inferiores.
No xuízo celebrado na Audiencia, os acusados recoñeceron que se viron implicados nunha pelexa, pero na que recibiron a peor parte por parte do suposto agredido e de máis xente que non foi identificada. Todo golpe que lle deran foi, segundo sostiveron, en defensa propia. A sentenza non dá por válida esta versión dos feitos, senón que considera acreditado que eles foron os autores das malleira.
Relacionadas:
-
Piden cárcere e expulsión do país para un mozo que agrediu a outro en Benito Corbal
Por Redacción |
-
Dous acusados dunha malleira no exterior dun pub alegan defensa propia: "Yo protegí mi vida, que me mataba"
Por Natalia Puga & Mónica Patxot |
-
Un acusado preséntase bébedo nun xuízo e, cun acompañante, increpa á prensa
Por Natalia Puga & Mónica Patxot |