A bandeira xitana ondea por primeira vez en Pontevedra: "Es un día histórico para nosotros"
Por Alejandro Espiño
Case un millar de xitanos viven en Pontevedra. Todos eles están hoxe de parabéns. Por primeira vez, con motivo do Día Internacional do Pobo Xitano, a súa bandeira ondea na antiga casa consistorial da Praza de España.
A bandeira azul e verde -que representa o ceo e a terra- coa roda de dezaseis radios en cor vermella, como símbolo da súa tradición nómade, foi pendurada do balcón nun acto simbólico que protagonizaron o alcalde de Pontevedra, Miguel Anxo Fernández Lores, a concelleira de Benestar Social, Carmen Fouces, e representantes da Fundación Secretariado Xitano.
Deste xeito, o Concello de Pontevedra súmase a unha xornada que ten como fin visibilizar a realidade do pobo xitano e a súa cultura e denunciar as situacións de discriminación que enfrontan a cotío, a pesar da súa diversidade e pluralidade.
"Es un día histórico para los gitanos de Pontevedra", sinalaron Rebeca e Miguel Flórez, representantes da fundación, que coincidiron coa súa xente -todos eles visiblemente emocionados- á hora de sinalar que "nos sentimos más pontevedreses que nunca".
Ambos destacaron a importancia que ten este xesto "para la igualdad, el respeto, el reconocimiento y los derechos" do pobo xitano que vive en Pontevedra, principalmente no barrio de Monte Porreiro.
Dende a Fundación Secretariado Xitano traballan para combater a discriminación e a prol da integración, tendo na educación e formación dos máis novos -actualmente hai 75 menores xitanos escolarizados na cidade- e na inserción laboral os seus principais retos.
"En Pontevedra existe la inclusión por el bien de la comunidad gitana", explicou Rebeca Flórez.
A bandeira é, segundo o alcalde, a visualización de que o Concello "é a casa de todos os pontevedreses", sexa cal sexa a súa raza, a súa clase social ou a súa condición sexual.
Relacionadas:
-
Un día para reivindicar a igualdade do pobo xitano: "a sociedade tiña que facer un cambio de chip"
Por Natalia Puga & Mónica Patxot |
-
A bandeira tricolor do pobo xitano xa ondea na Casa Consistorial
Por Mónica Patxot & María José Pita |
-
"Queremos ser cidadáns de pleno dereito. Os prexuízos non nos deixan avanzar"
Por Alejandro Espiño |
-
Leonor deixa o cole, "se fose a princesa converteríase nunha cuestión de Estado pero como é xitana non lle importa a ninguén"
Por Oskar Viéitez & Mónica Patxot |