Fomento paraliza a musealización de 18 castros apelando á falta de Goberno en Madrid
Por Alejandro Espiño
A situación de incerteza política a nivel nacional afectou de forma directa ao proxecto para a posta en valor de 18 castros da provincia. Polo menos, iso é o que argumenta o Ministerio de Fomento, que se nega a cumprir os compromisos recollidos no protocolo asinado no seu día coa Deputación de Pontevedra.
O proxecto, consistente en tarefas de escavación en seis destes castros e labores de limpeza nos outros doce -traballos asumidos pola deputación-, ten que completarse coa musealización, consolidación, restauración, accesibilidade e sinalización dos mesmos, actuacións que son responsabilidade de Fomento.
Pero no goberno provincial aseguran estar "preocupados" pola inacción do ministerio. Carmela Silva denunciou hoxe que, a pesar de estar adxudicados estes traballos a unha empresa, o secretario de Estado négase a asinar a resolución do concurso "argumentando textualmente que non vai a mover un só papel mentres o Goberno estea en funcións".
Esta escusa sorprende á presidenta da deputación pontevedresa, xa que lembra que cando o Goberno concedeu a prórroga a Ence tamén estaba en funcións "e iso non supuxo ningún problema".
Os traballos que correspondían á Deputación -xa realizados na Trega (A Guarda), Castro Alobre (Vilagarcía) e A Lanzada (Sanxenxo)-, lembrou Carmela Silva, planificáronse para coordinarse con Fomento, de forma que a empresa adxudicataria empezase a traballar unha vez concluísen os arqueólogos provinciais.
"Se Fomento non actúa de forma inmediata as escavacións corren un grave risco de deterioro, xa que se atopan expostos á maleza e ás forte chuvias que temos en Galicia", advertiu Silva, que avanzou que ante esta situación os arqueólogos propuxeron aprazar o resto dos traballos de escavación e limpeza nos outros quince castros "para non correr o mesmo risco".
A Deputación remitirá unha carta ao Ministerio de Fomento para esixirlles que se cumpran os compromisos adquiridos.
Relacionadas:
-
Luz verde á musealización dos castros da Subidá, en Marín; e Alobre, en Vilagarcía
Por Redacción |
-
A Deputación paraliza as actuacións nos castros da provincia polo "absoluto deixamento" de Fomento
Por Redacción |
-
Os arqueólogos descobren o esqueleto dun segundo bebé no Campo da Lanzada
Por Oskar Viéitez |
-
Fomento e Deputación cítanse en Madrid para desbloquear a posta en valor dos castros
Por Redacción |
-
O xacemento da Lanzada é "o mellor libro de historia de toda Galicia"
Por Redacción |
-
Máis de 20.000 pezas saen á luz no xacemento de Castro Alobre
Por Redacción |
-
Unha vintena de empresas, interesadas en musealizar os castros da provincia
Por Redacción |