Un rocódromo e un minicine, principais novidades de Pontexogos
Por Redacción
A iniciativa da Concellería de Promoción Económica para estimular as vendas de Nadal por parte do comercio local chega este ano con importantes novidades. Pontexogos abrirá as súas portas na praza de España este venres, cunha oferta lúdica reforzada para captar o interese dos pequenos e dar así facilidades ás familias para realizar as súas compras.
A concelleira Carlota Román anunciou unha renovación que pasa pola incorporación dun rocódromo inchable de oito metros de altura e un minicine chamado "A caixiña dos mistos". Novidades que complementan ao xa tradicional tiovivo e á completa oferta de obradoiros para manter ben ocupados aos máis pequenos de cada casa.
Pontexogos abrirá ata o 4 de xaneiro, pero atención aos horarios, porque serán de 16.30 a 20.00 horas ata o próximo venres, día 19. E a partir de aí abrirá de 11 a 13.30 e de 16.30 horas a 20.00 horas, agás na propia despedida do día 4, na que só funcionará en horario de mañá. Como sempre pecha nos festivos do 25 e do día 1.
Para o acceso ás instalacións non se esixe o pago de ningunha entrada. Unicamente volve ser requisito a presentación dun tique de compra nalgún establecemento comercial de Pontevedra por importe mínimo dun euro. O obxectivo, recalcou Carlota Román, é dinamizar a campaña de Nadal e Reis no comercio local. Iso permitiu acadar cifras de 20.000 visitantes durante os dous últimos anos, e todo indica que manterá a tendencia neste. Sen dúbida, engadiu a responsable municipal, trátase dunha das actividades máis multitudinarias de cantas organiza o Concello de Pontevedra.
A praza de España volve ser o epicentro do programa coa instalación dunha carpa de 400 metros cadrados en forma de cúpula. Aburrirse está prohibido e para elo ofrécense circuítos de psicomotricidade, patíns, obradoiros de repostería e panadería, actuacións de títeres, magos, contacontos, xogos tradicionais e unha visita de Papá Noel.
Como case todas as actividades da Concellería de Promoción Económica, Pontexogos tamén terá unha presencia moi activa na Internet e nas redes sociais. Está operativo un blog, unha páxina en Facebook e haberá códigos QR para facilitar o acceso a estes portais dixitais.
Relacionadas:
-
O tiovivo, atracción estrela dun Pontexogos que rexistrou máis de 20.000 accesos
Por Redacción |
-
Chegan os artesáns á praza do Teucro
Por Redacción |
-
O iglú máis divertido está na praza de España
Por Mónica Patxot |
-
A pista de xeo do Recinto Feiral será, de novo, o grande atractivo de Nadalocio
Por Alejandro Espiño |