Patrimonio avaliará a importancia de dous enlousados pétreos aparecidos nas obras de Santa Clara
Por Redacción
Dous tramos de lousado de pedra apareceron durante as escavacións que se están realizando con motivo das obras de reforma da rúa Santa Clara. Segundo expoñía Israel Picón, o arqueólogo que supervisa os traballos, e o concelleiro de Urbanismo, Antón Louro, os primeiros indicios situarían estes restos en relación coa "vía dos arrieiros" correspondente ao antigo Camiño Vello de Castela, polo que se trasladaba o viño branco e tinto do Ribeiro.
Louro iniciou xa os contactos cos técnicos de Patrimonio e estúdase a posibilidade de remover todo o pavimento pendente para determinar o alcance dos restos arqueolóxicos no ámbito das obras que se acometen. O informe arqueolóxico de valoración será enviado a Patrimonio Cultural da Xunta de Galicia, que deberá tomar a decisión sobre as medidas preventivas que se acometan antes de continuar coa obra da urbanización.
O concelleiro de Urbanismo afirmou que as obras "se ven facendo con cautelas porque se presumía que puidera aparecer algún resto de interese arqueolóxico" e que estes achados non van condicionar o proxecto nin paralizarán os traballos. O director arqueólogo do proxecto engadiu que "é posible que se poidan atopar máis restos porque é a zona máis sensible" ao encontrarse próximo ao casco histórico, á antiga muralla e á desaparecida fonte de Santa Clara. Un dos tramos de lousados aparecido encontrouse mentres se traballaba nunha das instalacións de pluviais e agora terá que estudarse se estes achados arqueolóxicos se corresponden co Camiño Vello de Castela.
Tamén se encontrou unha peza de cerámica da época medieval e tradición Talavera, azul con orlas en bandas douradas. Trátase dun tipo de peza característica entre os restos que se encontran na zona de Pontevedra debido á súa actividade portuaria.
A reforma da rúa de Santa Clara, conta cun presuposto de 676.199 euros, comezou a finais do pasado ano e está previsto que poida estar finalizada entorno ao mes de setembro.
Relacionadas:
-
Os comerciantes de Santa Clara protestan polo atraso da reforma da rúa
Por Oskar Viéitez & Mónica Patxot |
-
As obras en Santa Clara sufrirán un atraso de dúas semanas pola aparición de restos do Camiño de Castela
Por Redacción |
-
Escavarán parte de Santa Clara ante a aparición dos últimos achados arqueolóxicos
Por Redacción |
-
A segunda fase das obras de reforma de Santa Clara, listas antes de que acabe xuño
Por Redacción |
-
As obras de Santa Clara atrasaranse "varios meses" e estarán rematadas "en agosto ou setembro"
Por Redacción |