A xamaicana Tajay Ashmeade reforza o xogo interior do Arxil
Por Redacción
O Club Baloncesto Arxil confirmou este xoves a contratación da pívot xamaicana Tajay Ashmeade para a presente tempada.
Tajay, que xa conta con experiencia na Liga Feminina Dous tras pasar polo Universitario de Ferrol, chega ao club verde para reforzar o xogo interior do equipo e intentar cubrir a importante baixa de Olga Fedorova por maternidade.
A xogadora encóntrase estes días disputando o campionato centroamericano coa súa selección e non está previsto que chegue a Pontevedra ata o 3 de outubro para incorporarse aos adestramentos do equipo.
O Arxil dá por pechado o seu plantel con esta incorporación, que espera achegue efectividade no aspecto defensivo e reboteador.
Tajay Ashmeade podería debutar ás ordes de Mayte Méndez o sábado 5 de outubro no partido de Copa Galicia ante o Pabellón Ourense.