Australia, segunda parada nas Series Mundiais de tríatlon para Javi Gómez Noya
Por Redacción
Javi Gómez Noya volve competir nas Series Mundiais de tritalón na segunda proba puntuable da tempada, que se celebrará o vindeiro sábado 8 de abril na localidade australiana de Gold Coast.
Tras o seu brillante debut en Abu Dhabi o pentacampeón mundial enfrontarase en Australia a unha carreira en distancia sprint, que non afronta desde o ano 2015 en Edmonton.
A explosividade da distancia sprint (750 metros de natación, 20 quilómetros de ciclismo e 5 quilómetros de carreira a pé) non é o mellor para as súas características, pero espera sumar unha boa cantidade de puntos que lle permita colocarse en vantaxe na loita polo que sería o seu sexto título.
Non estarán en Gold Coast os irmáns Brownlee, pero si o actual campión mundial, o mallorquino Mario Mola, que se defende como poucos na modalidade sprint, ou o surafricano Richard Murray, gañador da recente Super League e que esta campaña venceu tamén en dúas carreiras da Copa do Mundo. Ademais na lista de saída tamén se atopa o talaverano Fernando Alarza, fincado actualmente en Pontevedra.
A carreira elite masculina dará saída ás 6:06 horas en España.
Tras esta proba, Gómez Noya ten intención de realizar unha nova concentración de adestramento en Nova Zelandia ata a próxima carreira das Series Mundiais, a segunda fin de semana de maio en Yokohama, Xapón.
Relacionadas:
-
A distancia sprint resísteselle a Gómez Noya, cuarto en Gold Coast
Por Diego Espiño |
-
Regreso soñado de Gómez Noya ás Series Mundiais, con vitoria en Abu Dhabi
Por Diego Espiño |
-
A reconquista de Gómez Noya empeza en Abu Dhabi
Por Redacción |
-
Os 'vampiros', á caza de Javier Gómez Noya
Por Redacción |
-
Exhibición de Gómez Noya no medio Ironman de Dubai: vitoria e clasificación mundialista
Por Redacción |