A Deputación prorroga os convenios co Concello de Pontevedra que ascenden a 6,2 millóns de euros
Por Oskar Viéitez
O pleno da Deputación de Pontevedra aprobou a prórroga do convenio de colaboración entre a institución provincial e o Concello de Pontevedra para poder rematar as obras da nova estrada de acceso ao Hospital de Montecelo.
Xunto a esta prórroga, a través de comisións de seguimento, desbloqueáronse outras tres obras tamén no Concello capitalino. En total as actuacións na capital da provincia ascenden a 6,2 millóns de euros financiados integramente pola institución provincial.
"A boa vontade do goberno provincial permitirá desbloquear estas actuacións", asegurou o vicepresidente Rafa Domínguez.
Sen embargo, o vicepresidente lamentou que se xustifique nas paradas de produción na diminución das redes loxísticas de transportes ou na climatoloxía adversa os retrasos das obras, cuxos convenios se asinaron nos anos 2021 e a comezos do 2022 e que levan anos en marcha.
A Deputación de Pontevedra está a financiar integramente con 1,4 millóns de euros o viario de acceso rodado e peonil ao novo equipamento hospitalario de Montecelo, e prorroga a vixencia do convenio asinado o 22 de outubro de 2021 ata o 31 de decembro de 2024.
Xunto a esta actuación, prorrógase o convenio co Concello ata o 31 de outubro de 2024 para a renovación da iluminación pública do centro urbano na que a institución provincial está a investir 1,6 millóns.
No caso das obras de rehabilitación interior e mellora da accesibilidade da casa consistorial, nas que Deputación está a investir 1,2 millóns de euros (o 90% do custe da actuación) por medio dun convenio asinado o 23 de decembro de 2021, prorrógase o seu remate ata o 31 de outubro de 2024.
E por último, no que respecta ás obras de remodelación do viario perimetral da praza de Barcelos, nas que a institución provincial está a investir 2 millóns de euros, prorrógase ata o 31 de outubro de 2024.
Relacionadas:
-
As incómodas cadeiras e o palio da Presidencia
Por Oskar Viéitez & Mónica Patxot |
-
Amplían dous meses máis o prazo para mellorar a iluminación da zona sur da cidade
Por Oskar Viéitez |
-
As obras de reforma da casa consistorial estarán finalizadas o 20 de xaneiro, na celebración de San Sebastián
Por Mónica Patxot & Anxo Lourido |
-
En vías de solución os problemas causados pola construción do vial de acceso ao novo Montecelo
Por Oskar Viéitez | Creada e actualizada