Piden medidas urxentes para mellorar a puntualidade e reducir as esperas no autobús entre Marín e Pontevedra
Por Redacción
O BNG de Marín solicita ao goberno local que inste á empresa Monbus a ofrecer un servizo de calidade no autobús entre Marín e Pontevedra, cumprindo estritamente os horarios establecidos e reforzando as rutas nos momentos de maior demanda.
A portavoz municipal BNG, Lucía Santos, trasladou á Comisión Informativa de Seguridade e Mobilidade os problemas que afectan a este servizo de autobús Marín-Pontevedra xestionado por Monbus.
Lucía Santos subliña que as liñas de transporte non están a cumprir os horarios establecidos, o que provoca importantes atrasos nas rutas.
Segundo asegura, os tempos de espera nas paradas pasaron de 20 minutos, como está indicado nos horarios, a 40, o que causa molestias e inconvenientes para as persoas usuarias que dependen deste servizo para os seus desprazamentos diarios.
Este servizo de transporte rexistra unha gran demanda durante todo o ano e atende as necesidades de estudantes, traballadores e traballadoras e aquelas persoas que desexan gozar das praias durante os meses de verán, entre outras. Con todo, as queixas da cidadanía sobre os incumprimentos dos horarios e a sobrecarga nos autobuses "veñen sendo unha constante dende hai tempo".
A portavoz do BNG engade que as liñas de transporte con maior demanda, como os horarios de primeira hora da mañá ou do mediodía, están saturadas. Iso implica que moita xente se vexa obrigada a agardar na parada polo seguinte autobús.