"Illas das Marabillas", un xogo de mesa que explora o tesouro das Cíes, Ons, Sálvora e Cortegada
Por Oskar Viéitez
Vén de saír ao mercado "Illas das Marabillas", un xogo de mesa que explora o tesouro das Cíes, Ons, Sálvora e Cortegada.
Trátase dunha proposta que ten como obxectivo achegar á poboación infantil e xuvenil ao rico patrimonio natural e cultural do Parque Nacional das Illas Atlánticas de Galicia.
O vigués Pablo Culebras impulsa esta proposta co apoio do Parque Nacional e financiado pola Unión Europea con fondos Next Generation.
As Illas Atlánticas son unha xoia natural das Rías Baixas que teñen protagonismo nalgúns dos episodios máis fascinantes da nosa historia, desde a procura das lendarias Kassiterides e as viaxes de César ata o naufraxio do Santa Isabel, pasando polas expedicións de Sir Francis Drake ou a tráxica historia de María Soliña.
A través deste xogo de rol, os afeccionados á fantasía, a natureza e a historia poderán mergullarse na riqueza ecolóxica, histórica e etnográfica destas illas, contribuíndo a unha maior comprensión e aprecio da súa importancia.
O xogo preséntase en catro versións, unha para cada un dos arquipélagos que compoñen o Parque (Cíes, Ons, Sálvora e Cortegada). Un número limitado de cada unha destas versións será distribuída gratuitamente en Bibliotecas e institutos de cada un dos concellos asociados, e uns cuantos serán entregados ao Centro de Visitantes do Parque.
O xogo de rol está concibido como "sandbox", e dicir, a persoa que dirixe o xogo prepara unha serie de situacións, localizacións e faccións e deixa que sexan os xogadores os que decidan que é o que queren facer, reaccionando ás súas accións e plans.
Así, propón un conxunto de regras básicas, unha galería de personaxes e unha selección de especies de animais de cada un dos arquipélagos, apela á creatividade e curiosidade dos xogadores para ampliar o mundo presentado nos taboleiros, tanto para incorporar novas especies de fauna e flora que poboan as illas no "plano real" como para deseñar novos personaxes que o habitan na "dimensión máxica".
Coa axuda de especies de aves, mamíferos, animais mariños e mesmo insectos, deberán sortear as dificultades, amenazas, monstros míticos e pobos máxicos inimigos para atopar sete moedas de distintos periodos históricos perdidas nas augas e terras da área protexida.
Relacionadas:
-
Unha mostra do CEMMA en Vilagarcía invita a coñecer mamíferos mariños e tartarugas das Illas Atlánticas
Por Redacción |
-
Unha decena de voluntarios realiza labores ambientais na illa de Cortegada
Por Redacción |
-
A illa de Ons colga o cartel de "completo" para os primeiros 12 días de agosto
Por Redacción |