Un portal facilitará a empresas e traballadores a busca de emprego en Poio
![Redacción](/web/cache/scene/uploads/xornalistas/foto/_S7QytKoutjK3UsovKMnMzytWsi62MjSxUqrKz891Lsov0DEyAC_/_Il61oA_/506490f5a15ce-c6ku5opwb5qbtijalxd0_reasonably_small.jpeg)
Por Redacción
O Concello de Poio activa nas redes sociais o portal empregoenpoio, unha nova ferramenta que leva unha semana en probas e coa que busca favorecer a comunicación entre empresas e demandantes de emprego do municipio.
As persoas demandantes de emprego e as empresas que teñan algunha praza que cubrir e estean interesadas en participar nesta iniciativa poden darse de alta no servizo de orientación laboral do Concello de Poio ou pedir máis información a través do propio portal nas redes sociais.
O perfil de empregoenpoio nas redes sociais facebook e instagram vai poñer a disposición das persoas interesadas ofertas de traballo e de formación actualizadas, de xeito que toda a información quedará centralizada nun mesmo espacio para que a consulta sexa o máis rápida e áxil posible.
Desta maneira, no caso de que alguén estea interesado na oferta, vaise poder tramitar de xeito sinxelo.
A través do servizo de orientación laboral municipal vincularase un número de teléfono e un correo que porá en contacto directo ás empresas coa técnico e, posteriormente, cos traballadores que se adapten ao perfil, e viceversa.
A concelleira de Promoción Económica, Maritxe González, e a orientadora laboral do Concello de Poio, Montserrat Soto, presentaron a iniciativa o xoves ante o tecido empresarial, e destacaron que é fundamental poñer a disposición dos veciños todas as ferramentas posibles.
A edil explicou que, con esta ferramenta, "queremos promover un emprego de proximidade e de calidade, para xerar así unha economía circular no noso concello".
Maritxe González explica que na semana en probas este novo portal os resultados están sendo moi positivos, pero agora será necesario levar esta iniciativa a todas as empresas, entidades e pequenos negocios de Poio.