Suspendidas as obras de humanización en Liñares para incluír melloras no proxecto
Por Oskar Viéitez
O Goberno local decidiu suspender temporalmente a humanización en Liñares para incluír melloras no proxecto e atender imprevistos que xurdiron no inicio das obras, e que ocasionan a necesidade de redactar un proxecto modificado, que xa se encontra en fase de redacción por parte dos técnicos municipais.
Ademais, aproveitarán tamén para recoller algunhas das demandas e propostas que fixeron os veciños na reunión que mantiveron co alcalde, Ángel Moldes, hai unhas semanas.
A suspensión temporal das obras aprobouse este martes na Xunta de Goberno local, e como explicou Moldes, unha vez realizadas as escavacións detectouse que os tubos da rede de pluviais presentaban un estado de deterioro importante que requiría da renovación da rede. A non renovación, indicou, podería ocasionar roturas e posibles inundacións na zona.
Polo tanto, asegurou o alcalde que "por responsabilidade e porque do que se trata é de facer ben as cousas e pensando a longo prazo", a suspensión temporal redundará nunha mellora do proxecto e en "dar resposta ás carencias detectadas".
Ademais da renovación da rede, tamén incluíran na modificación do proxecto actuar no pozo de acceso ao regato existente na zona, que non se incluía no orixinal e que durante a reunión que mantivo o alcalde, Ángel Moldes, cos veciños da zona detectaron que era unha carencia importante no proxecto, principalmente en materia de seguridade.
De feito, no inicio das obras detectouse que toda esa zona estaba en mal estado, debido a que se produciu o minado do terreo e podería chegar a provocar afundimentos do firme.
Ángel Moldes e o Concelleiro de Obras e Servizos, Marcial García, volverán a reunirse cos veciños nos próximos días para informar dos novos prazos e da decisión adoptada, que busca mellorar a calidade da obra e dos servizos que se prestan. A suspensión da obra será ata que se aprobe o proxecto modificado, que neste momento están redactando os técnicos.
A humanización de Liñares acometerase con fondos do Plan Concellos da Deputación de Pontevedra. O custo ascendía a 149.789,94 euros, e contemplaba mellorar a accesibilidade, renovar o pavimento e os servizos básicos e novo alumeado público máis accesible.