Rouban no Centro Cultural de Ponte Caldelas e causan estragos no mobiliario
Por Redacción
O Centro Cultural de Ponte Caldelas sufría un roubo durante a pasada madrugada cando uns asaltantes forzaron a entrada principal do edificio e provocaron pequenos estragos en portas e no mobiliario en busca de diñeiro.
Os axentes da Policía Local procederon a inspeccionar o interior do centro onde puideron comprobar que varias portas pechadas con chave foran forzadas con pancas ou esnaquizadas, supostamente, a patadas. Os asaltantes non se levaron os ordenadores da aula de formación nin se detectou a ausencia de ningún outro material do centro. Como xa vén sucedendo noutros roubos rexistrados no municipio durante as últimas semanas, os ladróns intentan localizar diñeiro en efectivo.
As forzas e corpos de seguridade incrementaron a súa presenza na zona tras os últimos asaltos a Igrexas. Durante a pasada noite tamén se rexistrou outro roubo de recadación nunha libraría da vila, situada na Praza de España. Segundo o Concello de Ponte Caldelas, a libraría suma xa tres roubos en pouco tempo e todos os asaltos contan cun modus operandi similiar polo que se sospeita que se trate dos mesmos autores.