O PP de Soutomaior cualifica de "tomadura de pelo" a renuncia á subvención para rehabilitar o colexio de Oliveira
Por Redacción
A renuncia do Concello de Soutomaior á subvención para rehabilitar o colexio de Oliveira "para non comprometer de maneira moi grave as arcas municipais", segundo xustificou o goberno local, causou sorpresa no grupo municipal do Partido Popular.
Para a súa portavoz, Noelia Ocampo, a decisión é unha "tomadura de pelo aos veciños".
"O PP deixou un concello completamente saneado e sen ningunha débeda ou pago pendente. É incomprensible que o BNG diga que 300.000 euros comprometen os orzamentos do Concello, simplemente é mentira", defende Ocampo.
Para a portavoz popular recibir unha subvención deste tipo non é sinxelo, asegurando ademais que no caso do proxecto de Oliveira "as axudas PIREP, que son as que agora rexeita o alcalde, ordenaron os proxectos en función da calidade arquitectónica, a solidez, a gobernanza e a innovación e o de Oliveira quedou moi por diante da media de todos os aprobados en España".