Forzáns pide á Xunta un acceso peonil seguro que conecte a parroquia con Caritel
Por Oskar Viéitez
A Asociación de Veciños de Forzáns, presidida por Pilar Fernández, trasladou á Xunta a necesidade de crear un acceso peonil seguro que conecte esta parroquia coa veciña de Caritel e solucionar así os "graves problemas de seguridade viaria que presenta a PO-255" no treito que une as dúas poboacións.
Esta asociación asegura que dende a Xunta trasladáronlles que realizarán una valoración económica da obra, para coñecer o custo que tería dita actuación e analizarán as solucións de conectividade entre traxectos da estrada vella en desuso coa limpeza e ampliación de cunetas para favorecer o paso seguro dos viandantes detrás dos quitamedos existentes.
Outro punto tratado foi o funcionamento do servizo de transporte que afecta a usuarios da liña de autobuses que comunica a Forzáns con Ponte Caldelas e Pontevedra xa que esta asociación asegura que "as frecuencias son practicamente inexistentes" posto que hai un servizo ás 8 da mañá e outro de volta ás 20 horas "o que fai ineficiente o transporte público para o uso tanto de público en xeral como estudantes que teñen que desprazarse andando desde Caritel ou desde Vilán para poder facer uso do servizo público de transporte".
Os veciños apuntaron que a administración autonómica analizará a necesidade de crear unha nova frecuencia.
A presidenta da asociación de veciños, Pilar Fernández, tamén lembrou "a necesidade de que o servizo de mantemento de estradas proceda a arranxar a beirarrúa próxima á rotonda que vai para Fornelos que conta con varias baldosas levantadas o cal supón un risco para os transeúntes, un problema que, segundo o acordado, será solucionado nas próximas semanas".
MELLORA DO FIRME FORZÁNS-GAXATE
Outro dos temas tratados na xuntanza foi a necesidade de mellorar e ampliar a plataforma da estrada que une Forzáns con Gaxate e Berducido, "moi deteriorada e pendente dunha actuación desde hai moitos anos e que vese obrigatorio acometer canto antes".
Aínda así, a Asociación de Veciños de Forzáns "consciente de que se trata dunha obra de gran envergadura que precisa dun investimento considerable" solicitou que, sen renunciar a esta actuación, se estude a posibilidade de ampliar ou mellorar as cunetas "co fin de que tamén poidan servir de paso peonil e mellorar así a seguridade do vial para as persoas que diariamente a percorren".
Tamén se pediu a limpeza regular destas cunetas para solventar problemas de pluviais na estación invernal.
Solicitouse tamén a colocación dun sinal que reduza a velocidade de paso dos vehículos pola variante de Forzáns xa que atravesa o camiño tradicional dos Sollos, que acaba de ser rehabilitado como ruta de sendeirismo pola veciñanza, e supón un problema de seguridade para os viandantes.
XUNTANZA MANTIDA CO ALCALDE DE PONTE CALDELAS
A directiva da Asociación de Veciños de Forzáns mantivo tamén unha xuntanza co alcalde de Ponte Caldelas, Andrés Díaz, a quen lle trasladou varias peticións da veciñanza desta parroquia para que se teñan en conta desde o Concello como son a limpeza de varios camiños, colocación de puntos de luz, mellora do acceso ás vivendas de varios veciños ou habilitar solucións ás pluviais que provocan problemas en varios lugares da parroquia.
Tamén pediron varias reparacións nas instalacións do Centro Sociocultural de Forzáns que inclúen as pingueiras e falta de luminosidade interior, reparación das perdas nos lavadoiros que limparon os operarios do Concello coa motobomba e unha barandilla de protección no remate dun camiño para evitar problemas de seguridade ao haber diferentes niveis de altura.