Un paseo polo patrimonio da ría de Pontevedra? Facémolo 'Cos 5 sentidos'
O patrimonio cultural é un dos elementos da riqueza que aglutina a ría de Pontevedra e o podcast 'Cos 5 sentidos' fixa a súa atención nel. A través destes programas de PontevedraViva Radio póñense en valor estes emprazamentos que falan da historia e tradición de Pontevedra, Poio e Marín.
A modo de audioguías entramos 'Cos 5 sentidos' no que foron e seguen sendo, entre outros, lugares como as prazas do centro histórico de Pontevedra; os hórreos, cun exemplo recoñecido como o que se sitúa no Mosteiro de Poio ou a herdanza prehistórica dos Labirintos de Mogor, en Marín.
Estes podcast son unha publicación divulgativa que está financiada polo Plan Social Ence - #enceplansocialpontevedra - e aos que se accede a través da web de PontevedraViva Radio.
O primeiro dos programas, dispoñible desde o pasado mes de setembro, forma parte dunha triloxía dedicada a percorrer a zona vella pontevedresa a través das súas prazas.
O segundo deles poderase escoitar en streaming desde o vindeiro venres 13 de outubro e tamén escoitar e descargar en calquera momento desde a mesma web.