O BNG vincula a subida do IBI coa "política de cemento e especulación" de Telmo Martín
Por Redacción
O grupo municipal do BNG criticou duramente a suba de impostos que vai aprobar o goberno municipal de Sanxenxo, unha decisión que vincula coa "política de cemento e especulación" da que responsabilizan ao alcalde, Temo Martín.
Os nacionalistas consideran que o incremento previsto no IBI e na viñeta converterán estes dous recibos nos máis elevados da comarca.
"É unha taxa que se aplica sobre o valor dos inmobles, que actualmente teñen un índice moi elevado, froito da especulación urbanística que abandera o señor Martín", engade Fran Leiro.
A 'viñeta', pola súa banda, segundo Leiro, pasa a ser a segunda máis cara de toda a comarca do Salnés, sendo só maior a que está a aplicarse en Vilagarcía.
O BNG sostén que "é curioso que esta suba chegue xusto despois de que os salarios do equipo do señor Martín pasen a ser máis elevados", incidiu o seu voceiro, que acusa a Telmo Martín de mentir "de xeito flagrante e descarado" á cidadanía.
"Non pasaron nin tres meses desde que o señor Martín vendeu como eixo principal da súa campaña a baixada de impostos e agora dedícase a subilos, nun momento no que a situación económica é complexa", sentenciou o edil nacionalista.