Apple fíxase nunha pequena editorial do Grove
Por Oskar Viéitez
O nome dunha pequena empresa pontevedresa sorprendía este martes os que seguían a última conferencia dos responsables do xigante Apple. Que é Imaxina Novas Tecnoloxías?
A firma de Cupertino acaba de abrir unha zona de libros de texto, iBooks Textbooks, unha área dentro da súa tenda de libros que ata agora só funcionaba en Reino Unido, Estados Unidos, Canadá e Australia. Dende agora España é un dos 51 países que poden acceder a este contido.
Nesa biblioteca virtual, xunto ás editoriais de corte académico Oxford e Cambridge, ou a española Santillana, posiciónase a pontevedresa Imaxina, unha editorial do Grove.
Os responsables de Apple destacan a "frescura" das propostas desta pequena editora online, coas súas propostas un libro para coñecer mellor os sentidos e outro dedicado ás orixes da Terra, con versión tanto en español coma en inglés.
Na conferencia celebrada este martes para anunciar as súas novidades, Eddy Cue, vicepresidente sénior de Software e Servizos de Internet de Apple, presumiu dos 30 anos de experiencia da súa empresa no mundo educativo. E é que, a día de hoxe, a aposta da compañía da mazá é o iPad, a tableta, xunto co software, e é neste punto onde aparece a compañía do Grove, un perfecto aliado para competir con garantías no suculento negocio da educación.
"Cremos que recursos como os libros de texto de iBooks supoñen un cambio radical na forma de aprender porque fan que interveñan diferentes habilidades de cada alumno", dixo Miguel Domínguez, director de Mercadotecnia de Imaxina Novas Tecnoloxias.
"Recursos como os libros de texto de iBooks representan un cambio monumental na aprendizaxe, xa que involucra a múltiples capacidades de cada estudante individual", di Miguel Domínguez.
Agora o seguinte paso será que as autoridades académicas dean o visto e prace, ao igual que sucede cos libros tradicionais, para a súa homologación cos contidos curriculares de cada nivel.