Aparatoso accidente múltiple en Cerponzóns
Por Oskar Viéitez
Ás 15:34 horas deste venres rexistrouse un aparatoso accidente na estrada N-550 no que se viron implicados tres vehículos. Concretamente o sinistro tivo lugar no punto quilométrico 114, na parroquia pontevedresa de Cerponzóns.
Segundo informa o 112 unha persoa resultou ferida nesta colisión múltiple. Sen embargo testigos presenciais elevan a tres o número de persoas feridas. Sendo trasladado un home en estado crítico ao Hospital Montecelo e dúas mulleres, feridas de diversa consideración, ao Hospital Domínguez.
Como consecuencia do accidente o tráfico viuse afectado sendo necesaria a intervención da Garda Civil para regular a circulación.
ACCIDENTE EN CALDAS
Unha muller de 56 anos e iniciais B.I.M. resultou ferida nun accidente de tráfico acontecido ás 10.59 horas na estrada N-640, á altura do punto quilométrico 223, no municipio de Caldas.
Segundo informan dende Protección Civil de Caldas, a condutora perdeu o control do seu Ford Focus saíndose da vía ata impactar contra o quitamedos.
A vítima foi trasladada nunha ambulancia do 061 ao hospital Miguel Domínguez de Pontevedra.