Organizan unha Plataforma plural para sumarse á querela arxentina contra os crimes franquistas
Por Redacción
A Fundación Alexandre Bóveda invita a todos os que se sintan afectados a sumarse á querela que a xustiza arxentina leva a cabo en Bos Aires contra os crimes cometidos pola ditadura franquista en España.
A iniciativa foi presentada nunha rolda de prensa celebrada este venres en Pontevedra polo voceiro da Fundación, Valentín García Bóveda, neto do ilustre galleguista, que compareceu acompañado do voceiro nacional do BNG, Xabier Vence, e do voceiro do goberno municipal de Pontevedra, Raimundo González.
A Fundación está a organizar unha Plataforma plural de apoio a esta causa aberta pola maxistrada María Servini, co obxectivo de presentar unha denuncia dentro da querela arxentina, "onde teña cabida toda a xente represaliada ou familiares de vítimas do franquismo entre 1936 e o 1977", polo que lanzou unha mensaxe "para que se animen e se sumen tamén á querela".
Ademais, recordaron que xa non é necesario presentar a documentación na Embaixada arxentina en Madrid, senón que chega con achegarse ao consulado de Vigo. Valentín García Bóveda remarcou o carácter plural desta Plataforma.
Pola súa banda Xabier Vence, sinalou que o Bloque Nacionalista Galego apoia esta querela arxentina e a todas aquelas organizacións de vítimas pola súa intención de participar no proceso aberto e anunciou que dende a formación nacionalista "imos levar adiante máis iniciativas para que se exprese o apoio dos nosos concellos a esta iniciativa", dixo.
Xabier Vence: "existe unha emerxencia de movementos de forzas e de campañas alimentadas pola extrema dereita neste país"
O BNG tamén actuará como denunciante, "imos abrir un proceso para presentar denuncias a todos aqueles casos de represións e crimes cometidos polo franquismo", anunciou Vence.
Xabier Vence sinalou a importancia deste proceso aberto pola Xustiza de Arxentina "nun momento no que existe unha emerxencia de movementos de forzas e de campañas alimentadas pola extrema dereita neste país que nos recorda en exceso o tipo de espírito violento e reaccionario que se viviu nos anos previos á Guerra Civil e durante o franquismo".
Segundo o voceiro nacionalista esta querela "non é un exercicio de memoria histórica", senón de "pedagoxía democrática para o futuro".
Finalmente Valentín García Bóveda, trasladou a súa "esperanza" en que esta querela arxentina inspirada no principio de xustiza universal que investiga os crimes contra a humanidade "supoña un punto e á parte na democracia española, para mellor".