Julia Varela e Xavi Martínez, un 'dúo incrible' para unha das grandes apostas da nova tempada de TVE
Por Alejandro Espiño
TVE segue confiando en Julia Varela. A xornalista pontevedresa poñerase á fronte da segunda tempada de Dúos Increíbles, o programa musical de maior audiencia da cadea, no que se enfrontan parellas formadas por cantantes de diferentes xeracións.
Farao acompañado de Xavi Martínez, coñecido polo seu traballo en Los 40 e que participou en numerosos formatos musicais ao longo da súa extensa carreira profesional.
Este proxecto reforzará a relación de Julia Varela coa radio e televisión pública española.
Comentarista do festival de Eurovisión desde 2015, Varela dirixe e presenta actualmente o programa Gente despierta nas noites de Radio Nacional.
Traballou ademais en Radio 3, foi reporteira en programas como Comando Actualidad e Las mañanas de La 1 e foi directora de A partir de hoy, un espazo de actualidade e entretemento que presentou Máximo Huerta.
Dúos Increíbles, producido por RTVE en colaboración con Grupo Ganga, emitirase na franxa de máxima audiencia da 1.
Nel, artistas consagrados e noveis, emparellados entre eles, compiten entre si interpretando grandes éxitos da música. Nesta segunda tempada, un novo dúo tomará o relevo da parella gañadora do ano pasado, Miguel Poveda e Antonio José.
Entre os veteranos que participaron nesta primeira edición estiveron Ana Belén, Antonio Carmona, Carlos Goñi, Diego Torres, Sole Giménez, Víctor Manuel, Ainhoa Arteta e Francisco.
As voces novas que concursaron no primeiro ano deste 'talent' foron Agoney, Nía, Chema Rivas, Marta Soto, Paul Alone, La Cebolla e a pontevedresa Yoly Saa.