A Illa das Esculturas estrea nova sinalización para facilitar información sobre as 12 pezas escultóricas
Por Redacción
A Illa das Esculturas xa conta cunha nova sinalización informativa co fin de achegar coñecemento e contexto ao redor das pezas artísticas que compoñen o conxunto escultórico que desde o ano 1999 habitan este espazo natural.
O alcalde, Miguel Anxo Fernández Lores, acompañado dos edís Eva Vilaverde e Xaquín Moreda, visitou esta mañá a Illa do Covo co fin de ver e ‘probar’ estes novos elementos trala súa instalación, que forma parte dunha segunda fase de actuacións municipais co obxectivo de poñer en valor todas as pezas do lugar. Cómpre lembrar que a primeira fase consistiu na limpeza das mesmas e da aplicación dun tratamento anti-grafitis.
"A posta en valor deste lugar e do conxunto escultórico era un compromiso deste Goberno, mellorando a sinalización das 12 esculturas que están neste espazo natural e que configuran un dos museos ao aire libre máis importantes de Europa", sinalou Lores. "Estamos a falar de 12 artistas que fixeron unha actuación en relación coa terra e coa pedra do país", engadiu.
O primeiro elemento está situado preto da pasarela peonil —a esquerda cruzando desde a zona dos antigos terreos de Tafisa— e conta cunha infografía de toda a zona, a situación das pezas escultóricas e un códigos QR para cada unha delas. Este código, que na actualidade pode ser usado activando a cámara da maioría dos móbiles e apuntando para o mesmo, leva até un arquivo de audio con información ao redor da obra en cuestión e do seu significado e historia.
Por suposto, ao pé de cada escultura tamén se atopan estes mesmos códigos para poder ter a información in situ, ao longo dun hipotético paseo pola zona. "Trátase de poñer en valor este espazo natural lembrando que é un museo ao aire libre con artistas de nomeada fama internacional", indicou o alcalde, sinalando ademais que os centros escolares poden solicitar visitas guiadas pola zona poñéndose en contacto co Concello de Pontevedra.
Nese sentido, o concelleiro Xaquín Moreda, explicou que tamén foi creada unha Unidade Didáctica para a ocasión, quedando a disposición dos centros escolares, e así "coñecer que significa cada peza e que buscaba o artista cando deseñou cada unha delas". Esta uniadade estará dispoñíbel na web do Concello nos vindeiros días.
Relacionadas:
-
Antón Castro, comisario da Illa das Esculturas, no 25 aniversario: "Provócame un sufrimento terrible vela así"
Por Mónica Patxot & María José Pita |
-
Conferencia sobre os carteis realizados para a campaña do referendo do Estatuto de Galicia de 1936
Por Redacción |
-
Outro xeito de descubrir os 'segredos agochados' do río Lérez
Por Rosalía Rico Otero & Alba Feijoo Alonso |