Os ceos continuarán cubertos de nubes ata o mércores
Por Redacción
A previsión dos técnicos de MeteoGalicia apunta ceos con nubes e claros en xeral durante os vindeiros días, aínda que ocasionalmente tornarán moi anubrados.
O luns aumenta a inestabilidade atmosférica en Galicia; situarase sobre a Comunidade un embolsamento de aire frío en altura e manterase o aire cálido en superficie. Agárdase un día de ceos parcialmente nubrados con chuvascos pola tarde máis activos no interior onde serán localmente tormentosos e poden vir acompañados de sarabia.
As temperaturas mínimas ascenderán lixeiramente mentres que as máximas seguirán sen cambios. O vento soprará frouxo, de dirección variable, agás nos momentos das tormentas cando soprarán localmente fortes.
Xa para o martes, avanza a previsión que Galicia quedará nunha situación intermedia entre altas e baixas presións. Deste xeito, o ceo estará parcialmente cuberto con chuvascos irregularmente repartidos, máis probables pola tarde no interior. As temperaturas mínimas non terán cambios significativos mentres que as máximas sufrirán un lixeiro descenso. O vento soprará frouxo variable pola mañá, tomando compoñente norte pola tarde.
As altas presións entrarán o mércores en Galicia desde o Atlántico achegando estabilidade. Deste xeito comezaremos o día con néboas en vales do interior, nubes baixas no norte de Lugo e na provincia da Coruña e nebulosidade alta no resto; pero a partir do mediodía o predominio será xa para os ceos pouco nubrados ou despexados. As temperaturas mínimas sufrirán un lixeiro descenso, pero as máximas ascenderán, acadándose valores propios desta época estival. Os vento soprarán con escasa intensidade, sendo de compoñente norte pola tarde.