O centro de día de Sanxenxo terá zonas de sombra e aparatos biosaudables no seu patio exterior
Por Redacción
Un convenio que asinarán o Concello de Sanxenxo e a Xunta de Galicia permitirá mellorar as instalacións do patio exterior do centro de día municipal de Sanxenxo.
Ambas as administracións expoñen dotar a este espazo de zonas de sombra e de aparellos biosaudables que permitan aos usuarios e usuarias realizar exercicio físico.
Así o acordaron o alcalde, Telmo Martín, e a conselleira de Política Social, Fabiola García, na súa visita ao centro de día, coincidindo cunha xornada de portas abertas.
Este centro de día está a piques de cumprir 20 anos e presta atención a 62 familias. Está, segundo o alcalde, en "moi bo estado" e ofrece aos seus usuarios un "amplo abano" de servizos e coidados que se verán agora mellorados con esta actuación.
Á xornada de portas abertas asistiron un total de 25 familias que percorreron as instalacións acompañados da directora do centro, María Insua, que explicou que aínda teñen prazas libres xa que a súa capacidade é para 80 persoas.
Nestes momentos, 60 dos usuarios son de Sanxenxo e 2 do Grove.
A media de achega por usuario é do 33%, é dicir, de 178 euros ao mes, transporte incluído. A xornada completa é de 9 a 19:30 horas, excepto sábados, domingos e festivos.
Os servizos que ofrece o centro de día, que conta con 18 traballadores, son terapia ocupacional, educación social, fisioterapia, animación sociocultural, enfermería, comedor e transporte.