Paseos terapéuticos para recuperarse de doenzas cardíacas
Por Natalia Puga & Mónica Patxot
Unha colaboración entre a unidade de Rehabilitación Cardíaca do Complexo Hospitalario Universitario de Pontevedra (CHUP) e a asociación Pontecorazón permiten a diario que aqueles pacientes que precisan recuperación de doenzas cardíacas realicen a actividade diaria que esixe a súa saúde física. O vindeiro venres 26 de maio, unirase a eles o Concello de Pontevedra nunha andaina para animar a que os hábitos de vida saudables sexan comúns a toda a poboación.
O alcalde de Pontevedra, Miguel Anxo Fernández Lores, mantivo unha xuntanza co coordinador da Unidade de Rehabilitación Cardíaca a do CHUP, Diego Fernández Redondo; Teodoro Vázquez Alfonsín, persoa operada de corazón e presidente da asociación Pontecorazón; e a concelleira Eva Vilaverde. Ao seu remate, deron conta desa andaina.
Esta cita será ás 10.00 horas do 26 de maio e está previsto que remate arredor das 12.30 horas. Partirá do Hospital de Montecelo, percorrerá a senda do Lérez ata Bora e rematará na Illa do Covo, un percorrido de arredor de 12 quilómetros.
Esta é a segunda andaina destas características que organizan e agardan a participación de entre 50 e 100 persoas. Na primeira foron unhas 50 e agora agardan que se vaia unindo xente que quere participar neste tipo de propostas.
O alcalde lembrou que este tipo de propostas busca "concienciar sobre a saúde e sobre o benestar", xusto o obxectivo de Pontecorazón e do CHUP cando impulsan que os pacientes poidan manter a actividade física logo de rematar o tratamento proposto pola unidade de rehabilitación cardíaca.
O doutor Fernández Redondo sinalou que a rehabilitación que se fai na unidade de rehabilitación cardíaca é a fase 2 da recuperación destes pacientes e dura entre dous e tres meses, en función do paciente e da súa patoloxía. Logo, para a fase 3, están en contacto con Pontecorazón, pois supón manter o exercicio como parte da súa rutina diaria durante o resto da súa vida.
Segundo os datos do doutor, en España, o 44% dos pacientes continúan a realizar este exercicio físico o resto da súa vida e esta porcentaxe sube ata o 60% en Pontevedra, pero aspiran a situala no 90%.