VÍDEO.- Rouban de madrugada en Informática Landín e levan preto de 6.000 euros en computadores portátiles
Por Diego Espiño
Un histórico establecemento comercial da cidade, a tenda de Informática Landín na rúa Cobián Roffignac, foi vítima dun roubo na madrugada deste sábado 15 de abril.
Sucedeu ao redor das 3.30 horas da madrugada cando tres homes enmascarados "tiraron a porta abaixo cun martelo e roubaron todos os portátiles que tiñamos á vista, cun valor duns 6.000 euros, máis un monitor que tiñamos na esquina", explicou a PontevedraViva Fabián, un dos encargados da tenda.
No vídeo da cámara de seguridade, cedido por Informática Landín, pódese comprobar como todo sucedeu en apenas un minuto.
"Foi moi rápido, mesmo non foron nin á caixa que normalmente é unha cousa que calquera ladrón quere levar. Igual pensaron que non había seguridade, soou a alarma, asustáronse e marcharon", relatan desde o establecemento afectado.
O xerente de Informática Landín, Javier Landín, quixo agradecer ademais "a rápida resposta da Policía Nacional e da policía secreta".
Os responsables do comercio presentaron a pertinente denuncia na comisaría coa esperanza de que se poida dar cos responsables do roubo.