Música en directo, obradoiros e negocios comprometidos enchen Virxe do Camiño de economía circular
Por Cristina Saiz & Redacción
A rúa Virxe do Camiño de Pontevedra encheuse de actividade na mañá deste sábado co Feirón PO2, organizado polo Concello dentro da súa filosofía ofrecer unha oferta de lecer nas rúas e prazas da cidade ao mesmo tempo que as transforma en espazos de reflexión e crítica.
Entre as 11.00 e as 15.00 horas, 13 expositores, a maioría de negocios locais de Pontevedra, ofreceron ás persoas que se achegaron ata este 'Feirón' produtos que impulsan a economía circular.
Baixo o lema ‘O que non se tira é o que menos contamina’, o Concello complementou estes expositores con música en directo, a cargo da artista pontevedresa Cora Velasco e o picadiscos Malaguita.
A rúa peonil tamén se encheu de actividade grazas a catro obradoiros. As persoas adultas aprenderon a facer a súa bolsa de tea e xabóns artesanais con aceite usado mentres que os nenos e nenas aprenderon a fabricar instrumentos musicais de refugallo e xabóns artesanais con esencias naturais.
Con esta actividade, que recibiu a visita das concelleiras Anabel Gulías e Pilar Comesaña, búscase crear novos hábitos colectivos que muden a industria e ofrezan un cambio aos sistemas produtivos.
Tiveron un posto neste 'Feirón': 'Factoría Atelier', 'Baia Revolución', 'Culebra Estudio', 'Totacha', 'Loba e oso', 'Palitrónica', 'Astrorecogida', 'Boa Vida Inclusión activa', 'Megabi Skate','Reparación de electrodomésticos Corral', 'Phone Service Center', 'Eusebio Rivero, reparación de bicis e arte' e 'Nobooks'.