Pontevedra é a provincia "por onde entra máis heroína" en España, con destino ao resto do país e a Portugal. Así o asegurou este mércores o inspector xefe do grupo 2 da Unidade de Droga e Crime Organizado (Udyco) da Comisaría da Policía Nacional de Pontevedra. Era unha realidade que xa viñan observando desde hai tempo e agora acaban de confirmalo coa incautación de 24,5 quilos de substancia no marco da operación Matoxo. 

O responsable policial compareceu coa subdelegada do Goberno en Pontevedra, Maica Larriba, e o comisario xefe provincial da Policía Nacional, Juan José Diaz Jiménez, e todos confirmaron a relevancia desta operación. 

En todo o ano 2020, en toda Galicia as Forzas de Seguridade interviñeron 28 quilos de heroína e en todo 2021 foron 39 quilos. Aquí, en Pontevedra, en só esta operación xa foron este ano máis de 24 quilos, o que supón máis do 60% do confiscado en toda a comunidade nun ano. 

No últimos dez anos, tan só este grupo de investigación incautou 236 quilos de heroína en Pontevedra.

Ademais, nos anos 2016 e 2017, nesta provincia batéronse récords de incautacións a nivel europeo, con 56 e 54 quilos por operación. 

Para confirmar a "envergadura importantísima" desta operación policial e da actividade detectada en Pontevedra, Maica Larriba sinalou que en toda España no ano 2020 interviñéronse 173 quilos de heroína e no ano 2021 a cantidade foi de 235. 

É unha provincia líder, segundo explicou o inspector de Udyco Pontevedra, porque os delincuentes que se dedican a este tipo de trafico ilegal en Pontevedra "son serios traballando", teñen as vías de comercialización abertas e os provedores seguen confiando neles para traer a droga desde a súa orixe. 

O delincuente que adoita dedicarse ao tráfico de heroína, habitualmente, non diversifica o negocio, senón que "só vende heroína, non se mete noutras substancias", de forma que adoitan estar moitos anos no mercado.