Condenado a 17 anos de cárcere un arousano por violar e maltratar a súa exparella
Por Oskar Viéitez
A sección cuarta da Audiencia Provincial de Pontevedra condenou a 17 anos de cárcere un home por violar e maltratar a súa exparella.
O tribunal considerouno culpable dun delito de agresión sexual, dous delitos de lesións contra a muller, dous delitos de malos tratos habituais no ámbito da violencia de xénero, un delito de ameazas leves e outro de inxurias á muller.
O tribunal considera probado que o sospeitoso e a vítima, que teñen dous fillos en común, mantiveron unha relación de parella durante uns dous anos. O acusado, o 1 de xaneiro de 2019, unha vez rota a relación, trasladouse a vivir ao domicilio da súa exparella. Tras a continuación da convivencia, segundo a sentenza, “levou a cabo un comportamento violento, posesivo e controlador para coa súa excompañeira sentimental”.
A resolución non é firme, pois contra ela cabe presentar recurso.
Durante o xuízo este home culpou a súa exparella das agresións sufridas, asegurando ao tribunal que non a denunciou para que "no rieran" del.
"Si voy a denunciar iba a reír de mí la Guardia Civil, no me iban a hacer ni caso"", xustificou este mozo, veciño de Vilagarcía de Arousa, que se declarou inocente.