O Pleno aprobou o V Plan de Igualdade do Concello de Bueu e a nova ordenanza de terrazas
Por Oskar Viéitez
O Concello de Bueu promove o V Plan para a Igualdade de mulleres e homes, que entrará en vigor logo de que se aprobase no pleno da corporación municipal desta semana, onde a proposta da concellaría de igualdade saíu adiante por unanimidade de todos os grupos.
Este será o instrumento que rexerá as liñas de acción de fomento da igualdade para os próximos seis anos, é dicir, dende o 2022 ata o 2027.
Segundo salienta Ana Isabel Otero, concelleira de benestar social e igualdade, "será unha ferramenta ante todo realista, con accións que se van levar a cabo nos diferentes eidos e que recolle unha política integral de promoción da igualdade".
Na estrutura do plan recóllense de sesenta e dúas medidas de actuación en oito áreas estratéxicas: a transversalidade de xénero, a violencia de xénero, educación e cultura, formación e emprego, ocio e deporte, participación política e social, saúde e benestar, e conciliación da vida laboral, familiar e persoal.
TERRAZAS
Na sesión plenaria ordinaria tamén se aprobou a nova ordenanza de terrazas.
Martín Villanueva, concelleiro de urbanismo, explicou que a nova normativa substitúe á que se aprobara no 2012 e que quedou rapidamente obsoleta ao xurdir novos espazos públicos, como rúas peonís ou o caso da céntrica Praza Massó.
A proposta aprobouse cos votos favorables dos grupos de goberno, BNG e ACB, e as abstencións de PP e PSOE.
SANIDADE PÚBLICA
Na sesión tamén saíu adiante unha moción sobre a sanidade pública na vila, presentada polo PSOE cunha emenda de BNG e ACB, mentres que a do PP, relativa aos arranxos na Escola de Cabalo, quedou descartada.