Xavier Vence (BNG): "Pontevedra debería ser o espello onde mirarse todas as cidades de Galicia"
Para o BNG o comercio de proximidade é un sector básico na economía galega. E neste sentido, propoñen exportar o modelo de Pontevedra a toda Galicia. Esta cidade "debería ser o espello onde mirarse todas as cidades de Galicia", sinalou Xavier Vence, portavoz nacional do BNG, que acompañado do alcalde da cidade, Miguel Anxo Fernández Lores, protagonizou este mércores un paseo por algunhas das rúas máis comerciais de Pontevedra.
Tras percorrer, entre outras, Michelena, Peregrina, Daniel de la Sota ou Benito Corbal, á beira tamén de varios concelleiros da formación nacionalistas, Xavier Vence puxo a Pontevedra de exemplo de "como é posible garantir unha gran calidade urbana ao mesmo que se promove a actidade económica dentro dos cascos urbanos, que é o que permite facer das vilas espazos vivos, onde se xenera emprego e riqueza".
A campaña comercial navideña é unha oportunidade, dixo, para reflexionar sobre este modelo de comercio. A Xunta "debería tomar nota dunha cidade como Pontevedra", afirmou o portavoz do BNG, para aplicar unha estratexia de desenvolvemento do comercio de proximidade. Especialmente, apuntou, para parar a "invasión" das grandes superficies nalgunhas cidades galegas "que están destruindo o comercio local, empobrecendo a vida de todos".
Neste sentido, Vence recordou que o BNG presentou unha iniciativa legislativa no Parlamento para que a Xunta de Galicia aprobe unha moratoria na implantación de grandes superficies, porque "sen o goberno autonómico é difícil que o resto do país mude o patrón de comercio". Asegurou que estas áreas comerciais abertas nos últimos anos "provocaron un abandono progresivo dos centros urbanos", agudizando a crise do pequeno comercio.
Esta estratexia de reforzo do comercio local debe servir, segundo o portavoz nacionalista, "para crear emprego e para incentivar a compra de produtos galegos", o que axudará a que os sectores produtivos do país "poidan manter a sua actividade produtiva". Aposta o BNG ademais por recuperar os mercados municipais, regular os horarios para normalizar as xornadas laborais ou establecer liñas de crédito prioritarias para o pequeno comercio.