O Concello creará unha lista para cubrir baixas entre os conserxes escolares
Por Alejandro Espiño
Que toda a rede de colexios de educación infantil e primaria de Pontevedra teñan o servizo de conserxería totalmente cuberto. Ese é o obxectivo co que o Concello, administración da que depende estas contratacións, busca cun novo proceso selectivo de persoal.
A intención do departamento municipal de Persoal, tendo en conta que todos os postos de conserxe están actualmente cubertos, é configurar unha lista de reserva para substitucións.
Esta proba para entrar a formar parte desta lista, que se convocará mediante concurso oposición, celebrarase "en cuestión de semanas", segundo a portavoz do executivo local, Anabel Gulías.
A este exame poderanse presentar todos os traballadores que teñan a categoría profesional de subalternos, é dicir funcionarios do grupo D.
O resultado do exame supoñerá o 60% da nota final, mentres que o 40% restante sairá da valoración dos méritos que reúna cada un dos aspirantes.