Alumnos de Marcón e Las Calasancias gañan o concurso de debuxo do Colexio de Avogados
Por Redacción
O concurso de debuxo para pequenos artistas 'Os Avogados' organizado polo Colexio de Avogados de Pontevedra tivo moi boa acollida entre os colexios e escolares da provincia, cun total de 289 obras presentadas. Ademais, tivo unha marcada presenza da capital, con dous alumnos de colexios do municipio entre os tres gañadores.
O xurado reuniuse para avaliar os debuxos presentados e decidiu premiar os realizados por alumnos de dous colexios da cidade de Pontevedra e un da localidade de Ponteareas. Os tres recollerán os premios o próximo martes 10 de decembro.
Na categoría de Educación Infantil resultou gañador un neno de 4 anos do CPR Las Calasancias de Pontevedra. No grupo de 1º a 3º de Primaria o xurado recoñeceu o debuxo dun neno de 8 anos do CPR La Inmaculada de Ponteareas. No apartado de 4º a 6º de Primaria o recoñecemento será para un neno de 10 anos do CEIP de Marcón, en Pontevedra.
O concursante premiado en idade Infantil será obsequiado cun lote de libros e películas. Na categoría de 1º, 2º e 3º de Primaria, o premio será unha bicicleta; e para o alumno de 4º, 5º e 6º, unha tableta.
Os premios serán entregados nun acto organizado para as 18.00 horas da tarde do 10 de decembro. Tanto os tres gañadores coma o resto de 286 debuxos presentados expoñeranse na sede do Colexio na rúa Raíña Victoria durante todo o Nadal.
O concurso, que se enmarca dentro das actividades organizadas este ano 2013 con motivo da celebración do 175 aniversario do Colexio, chamaba a participar a escolares dende Infantil ata sexto de Primaria de todos os colexios dos concellos da área de actuación do Colexio de Avogados.