O delegado da Xunta leva a tomar un café a un grupo de traballadores en folga
Por Oskar Viéitez
O delegado territorial da Xunta en Pontevedra, Luís López resolveu este mércores dunha maneira curiosa unha protesta laboral.
Un pequeno grupo de traballadores en folga esperábanlle á saída dun acto na sede de Afundación en Pontevedra, querían falar co representante da Xunta sobre a súa situación ao que el accedeu improvisando unha reunión nunha cafetería próxima mentres lles convidaba a tomar un café.
Concretamente, son traballadores que secundan a folga convocada polo sindicato CNT en centros de día, servizos de coidado a persoas maiores e escolas infantís Galiña Azul, para reclamar medidas contra a temporalidade e melloras nas condicións laborais.
Entre os motivos que levaron a esta protesta está que o xerente do Consorcio, Perfecto Rodríguez, non solicitase a Función Pública a convocatoria dun proceso selectivo propio, e que "desatenda as súas funcións, declarándose incompetente para negociar cando é o único que pode resolver o tema da temporalidade do persoal, como están a facer as xerencias doutros entes instrumentais".
Estes traballadores reclaman a garantía dunha convocatoria "única e específica" de oposición non eliminatoria, que se contabilice a formación impartida polo propio Consorcio, a retirada do concurso de traslados e unha baremación "xusta" na que a experiencia contabilice o 90% e que se puntúe a antigüidade no Consorcio o triplo que en calquera outra administración.