Dez anos de prisión por abusar sexualmente da súa curmá segunda desde que tiña 8 ou 9 anos
Por Natalia Puga
O Tribunal Superior de Xustiza de Galicia (TSXG) acaba de confirmar unha condena de dez anos de prisión a un pontevedrés por abusar sexualmente de forma continuada, e durante ao redor de catro anos, da súa curmá segunda.
A vítima era menor de idade e os abusos empezaron cando tiña oito ou nove anos e foron aumentando de intensidade co paso dos anos, ata que a nai do acusado descubriunos e a menor empezou a evitalo, aínda que non se atreveu a denuncialos ata anos máis tarde.
A Sala do Civil e Penal do alto tribunal galego considera probado que o acusado se aproveitou da relación familiar que tiñan e de que lle levaba máis de 30 anos para gañarse a confianza da vítima.
Esta sentenza confirma unha anterior ditada pola sección cuarta da Audiencia Provincial de Pontevedra. Os maxistrados do TSXG subliñan que comparten "plenamente" a forma en que o tribunal provincial valorou o conxunto das probas. Agora, contra esta segunda sentenza, cabe interpoñer recurso de casación ante o Tribunal Supremo.
Os maxistrados destacan a declaración "convincente" da vítima, que "colma os criterios xurisprudenciais que, con carácter orientador, establece o Tribunal Supremo, carecendo de motivación espuria".
Ademais, indican que existen outros elementos de corroboración, entre eles, a declaración da irmá maior da vítima, que confirma que o acusado adoitaba estar na casa cando elas chegaban, e do pai, que relata episodios nos que viu ao acusado espiando polas xanelas.
Tamén pesan os testemuños do adestrador e do preparador físico do equipo onde xogaba a menor, cos que compartiu por primeira vez o que lle ocorrera anos antes e as secuelas que padecía. Foron eles os que a convenceron para que acudise a un psicólogo. Tamén este profesional confirma a "absoluta credibilidade" da súa versión e as secuelas psicolóxicas que lle causou.
A Sala do Civil e Penal recalca que tamén resulta "moi relevante" o informe emitido polas forenses do Imelga e as súas aclaracións na vista, pola súa "gran solvencia técnica e exquisita obxectividade e rigor científico".
A sentenza conclúe que todo este conxunto de elementos "comporta unha completa e perfecta convicción" para o tribunal que presenciou o xuízo e valorou as probas practicadas e o TSXG, tras o visionado deste, non detecta "ningún indicio de erro".