Finalizados "con éxito" os cursos de verán da UNED
Por Redacción
A UNED de Pontevedra clausurou con "éxito de público e alumnado" os cursos universitarios postos en marcha durante os días 6, 7 e 8 de xullo e que versaron sobre as 'Portadas de igrexas medievais no Camiño de Santiago: orixe e evolución dos programas figurativos monumentais' a 'Economía Circular e Axenda 2030. Un camiño cara á sustentabilidade' e 'Quoi de neuf? Experiencias e propostas para a aula virtual de francés'.
As actividades desenvolvéronse no centro de Monte Porreiro e foron seguidos de maneira presencial e en liña, en directo ou en diferido por un gran número de alumnos que se matricularon desde diferentes puntos de toda España.
O curso sobre 'Portadas de igrexas medievais no Camiño de Santiago: orixe e evolución dos programas figurativos monumentais' estivo dirixido por dirixido por Inés Monteira Arias e coordinado por Miguel Larrañaga Zulueta.
Estivo orientado a interesados sobre a historia, a cultura e a arte medieval, onde os participantes aprenderon a utilizar diversas ferramentas de análises e comprensión das portadas do Camiño de Santiago á vez que se coñeceron testemuños documentais e artísticos sobre estas portadas románicas e góticas que lles permitiron comprender a transcendencia deste elemento na historia da arte posterior e o propio movemento xacobeo.
Dirixido por Ester Méndez Pérez e coordinado por José Manuel Ferreiro Mendoza, o curso de 'Economía Circular e Axenda 2030. Un camiño cara á sustentabilidade' estivo orientado cara a estudantes de calquera área de coñecemento; profesionais interesados na xestión da sustentabilidade; cidadáns implicados coa sustentabilidade e a responsabilidade ambiental e social e docentes de ensino primario, secundaria ou universitaria.
Os obxectivos foron coñecer a Axenda 2030 e os 17 ODS coas súas metas; entender que é a Economía Circular e a súa relación coa Axenda 2030; comprender en que consiste a xestión da sustentabilidade desde o ámbito público; incidir no coñecemento da Axenda 2030 e da sustentabilidade desde a educación; mostrar algunhas iniciativas institucionais e marcar estratexias de sensibilización.
Por último, baixo a dirección de Esther Juan Oliva e a coordinación de M. Mar Jiménez-Cervantes Arnao, a UNED puxo en marcha o curso 'Quoi de neuf? Experiencias e propostas para a aula virtual de francés' co que se pretendía reflexionar sobre o uso da tecnoloxía nas aulas de francés; presentar diversas experiencias levadas a cabo en diferentes contextos e analizar os procesos de innovación en relación coa tecnoloxía.
Finalziados loss cursos, o director do Centro Asociado da UNED en Pontevedra, Víctor M. González Sánchez valorou "moi positivamente tanto o nivel de participación do alumnado como a calidade docente do equipo encargado tanto de dirixir os cursos como de impartir as distintas disciplinas formativas". Estes cursos estiveron coordinados pola área de Extensión Universitaria que dirixe Rafael Cotelo Pazos.