Oito murais de azulexos recrean escenas marítimas no Paseo de Silgar
Por Redacción
O Paseo de Silgar é desde este xoves un espazo de exposición grazas aos oito murais de azulexos con 16 recreacións sobre o mar incluíndo naufraxios rexistrados na Costa da Morte. Esta exposición itinerante era inaugurada na contorna do Círculo dos Desexos por Paz Lago, concelleira de Cultura e por Gonzalo Rodríguez, fundador da Obra Social Suministros Lar.
Restos de azulexos forman esta mostra con obras que teñen forma de proa e que foron elaboradas por estudantes de institutos e por persoas con capacidades diferentes pertencentes a varios colectivos. Para realizar este traballo non se empregou ningún tipo de enerxía e os materiais son reciclados.
As obras forman parte da novena edición do concurso de Murais con Azulexos, que contou con 255 participantes. Cada unha destas pezas pesa ao redor dunha tonelada, segundo a organización, e conta cun código QR onde se pode consultar o proxecto e todo o proceso de traballo. Para a elaboración realízase un labor previo de investigación sobre a temática.
A reprodución da corveta francesa La Bayonnaise, da Asociación APEM, foi a gañadora do concurso. A obra reflicte a escena do navío francés encallado en augas de Fistera en novembro de 1803 cando era perseguido polo buque británico Ardent.