Investigan un veciño da Illa por circular con catro adhesivos de ITV nun ciclomotor dado de baixa en 2016
Por Redacción
Axentes da Policía Local da Illa de Arousa instruían este martes as dilixencias a un veciño do municipio como presunto autor dun delito de falsidade de certificados oficiais.
Os feitos remóntanse ao luns 25 de abril deste ano. Naquela xornada, os axentes deron o alto a un ciclomotor que circulaba por unha vía da Illa de Arousa. Unha vez comprobada a documentación descobren que o vehículo fora dado de baixa definitiva no ano 2016 e, por tanto, non podía circular. Ante esta situación, os representantes da Policía Local inmobilizaban o ciclomotor e retirábano da vía pública.
O curioso é que o vehículo presentaba catro adhesivos de superar a Inspección Técnica de Vehículos (ITV) nos últimos anos, segundo a información facilitada pola Policía Local. Tras realizar as correspondentes indagacións, os axentes realizaron o informe ao entender que o propietario estaría a incorrer nun delito ao haber falsificado esta documentación.
O Código penal recolle nos seus artigos 390 e 392 que o particular que cometese en documento público, oficial ou mercantil algunha falsidade alterando un documento nalgún dos seus elementos ou requisitos de carácter esencial será castigado coas penas de prisión de seis meses a tres anos e multa de seis a doce meses.