Investigan un mozo de Meaño que conducía co carné retirado e tras consumir cánnabis e cocaína
Por Redacción
Axentes da Policía Local da Illa denunciaron o pasado domingo a un mozo de Meaño de 32 anos que foi sorprendido conducindo pola localidade arousá a pesar de ter o carné retirado e consumira cánnabis e cocaína.
Axentes da Policía Local que realizaban labores de seguridade cidadá pola praza do Regueiro da Illa na tarde do domingo localizaron ao condutor infractor tras observar un turismo que circulaba de forma anormalmente reducida.
Os axentes sospeitaron que conducía desa forma posiblemente polo consumo de drogas ou alcol, de modo que procederon a darlle o alto e realizarlle probas de detección de drogas. O condutor deu positivo indiciario en cocaína e cánnabis. A falta da confirmación do positivo por parte do laboratorio, enfróntase a unha sanción de 1.000 euros e a retirada de 6 puntos do carné.
Os policías tamén comprobaron que o mozo tiña o carné suspendido, de modo que se lle comunicou que está investigado por un presunto delito contra a seguridade viaria polo que deberá comparecer perante o Xulgado de Garda de Vilagarcía. Por esta infracción, poderá ser condenado á pena de prisión de tres a seis meses, o pago dunha multa de 12 a 24 meses ou de 31 a 90 días de traballos en beneficio da comunidade.
Dentro das intervencións da Policía Local en materia de tráfico, na tarde do luns interceptaron a un condutor que circulaba nunha furgoneta coa ITV caducada desde o ano 2021. Procederon a impoñerlle unha sanción de 200 euros.
Trátase dun veciño da Illa de Arousa de 39 anos que ten o carné de conducir retirado por perda total de puntos, de modo que tamén se lle comunicou que está investigado por un delito contra a seguridade viaria polo que será sometido a xuízo rápido en Vilagarcía.
Relacionadas:
-
Cuspe e ameaza o policía da Illa que o detivo por conducir ebrio e drogado: "Métoche unha patada na cabeza que te deixo parvo"
Por Oskar Viéitez |
-
Detido un pontevedrés de 34 anos que trapicheaba con cocaína e haxix
Por Oskar Viéitez |
-
Interceptan por segunda vez a un veciño da Illa conducindo sen carné
Por Redacción |