As probas de acceso ao Conservatorio Profesional de Música de Vilagarcía comezan o 24 de maio
Por Redacción
Comeza o proceso para seleccionar o alumnado do Conservatorio Profesional de Música de Vilagarcía de Arousa para o curso 2022-2023. Rosina Sobrido, directora do Conservatorio e Argimiro Serén, concelleiro de Educación, presentaban as prazas que se ofertan e os requisitos que deben presentar as persoas interesadas.
Ofertaranse doce especialidades instrumentais: frauta, gaita, clarinete, percusión, guitarra, saxofón, piano, trombón, trompa, trompeta, violín e violoncelo. O número de prazas total que se ofertan elévase a 31, desta cifra 15 correspóndense co grao Elemental, para estudantes nados en 2014 ou en anos posterios, e 16 no Profesional, destinado a maiores de 12 anos.
O procedemento para inscribirse ás probas debe realizarse preferentamente a través do sistema en liña enchendo o formulario que o centro ten ao dispor das persoas interesadas nesta ligazón. O prazo de inscrición ábrese o luns 25 e péchese o xoves 28 de abril.
As probas para os dous graos están previstas para as xornadas entre o martes 24 e o martes 31 de maio.