A partir do mércores entra un anticiclón
Por Oskar Viéitez
A previsión dos técnicos de MeteoGalicia apunta que haberá ceos con nubes e claros en xeral durante os vindeiros días. Agárdanse precipitacións o luns e o martes. As temperaturas serán normais para esta época do ano, con mínimas sen cambios e máximas en ascenso lixeiro.
Este luns, tras o paso da fronte que comezou a atravesar Galicia durante a madrugada, Galicia quedará na zona de chuvascos que veñen detrás. Deste xeito, o ceo estará parcialmente nubrado con precipitacións, máis frecuentes e intensas na franxa atlántica sen descartar que sexan acompañadas de aparato eléctrico. O vento soprará de compoñente sur, moderado en xeral.
O martes seguirá a ser unha xornada de certa inestabilidade atmosférica por aire frío en capas altas. Con esta situación, agárdanse ceos con intervalos de nubes e claros, con chuvascos ocasionais, localmente treboentos. As temperaturas mínimas sufrirán un lixeiro descenso.
A situación do mércores será de transición cara á influencia anticiclónica sobre Galicia.
De este xeito, para o mércores agárdanse ceos con intervalos nubrados, con menos nubes pola tarde e con posibilidade dalgún chuvasco illado e ocasional, máis probable pola mañá. As temperaturas continuarán sen cambios ou con lixeiros ascensos. Os ventos serán frouxos, comezando o día do sur, pero rolando progresivamente a compoñente norte.