DomusVi abrirá o 25 de marzo a súa residencia de maiores en Pontevedra
Venres 25 de marzo. Esa é a data prevista para a apertura da residencia que DomusVi abrirá en Pontevedra, ocupando o solar da antiga comandancia da Garda Civil.
Polo momento, a apertura destas instalacións na rúa Loureiro Crespo será exclusiva para os medios de comunicación, que poderán coñecer a residencia ao detalle. O equipo directivo deste centro, con Sara Iglesias á cabeza, será a que guíe esta visita.
A residencia, que terá o nome comercial de DomusVi Cidade de Pontevedra, conta con sete plantas e capacidade para 120 residentes.
A compañía explica que as súas instalacións en Pontevedra son "modernas" tanto nos seus espazos interiores como nas súas "confortables" zonas ao aire libre.
A residencia ten ademais zonas de uso común como unha cafetería, un ximnasio e unha terraza cun horto urbano.
DomusVi realizou un investimento de case 8 millóns de euros para construír esta nova residencia, na que traballarán preto dun centenar de persoas.