Unhas bengalas de pesca provocan un incendio nun camión do lixo en Cambados
Por Oskar Viéitez
Unhas bengalas de pesca provocaron un pequeno incendio na caixa dun camión do lixo en Cambados.
Segundo informou o Servizo de Emerxencias de Cambados o suceso produciuse sobre as 11 da mañá, en Castrelo e non causou danos persoais, nin materiais de consideración.
Os ocupantes do camión escoitaron tres estoupidos na caixa e viron saír fume polo que deron a voz de alarma mentres baleiraban un extintor na carga.
Á súa chegada os efectivos de Emerxencias sufocaron o lume e procederon a arrefriar toda a carga, descubrindo entón a orixe do lume: unhas 30 bengalas de pesca.