O orzamento da Deputación para o ano que ven ascenderá a 146 millóns de euros
Por Redacción
O presidente da Deputación de Pontevedra, Rafael Louzán, comparecerá o mércores no Parlamento para expoñer as principais liñas do orzamento que a Administración Provincial prepara para 2014 e que ascenderá a un total de 146 millóns de euros.
Aínda que non están pechados, a Deputación traballa na elaboración duns orzamentos centrados en dúas liñas básicas de actuación: o investimento en política social e de emprego, e a construción e mellora de infraestruturas prioritarias fundamentais para a mellora da calidade de vida das persoas.
As contas redúcense nun 1,7% con respecto a 2013. O obxectivo e que a Deputación de Pontevedra se centre en dar cobertura ás necesidades básicas dos concellos, así como na política social e na promoción do emprego, que contarán con outros 20 millóns de euros de orzamento.
Así promove a prestación conxunta de servizos, ao que se destinarán uns 15 millóns de euros, e preto de 20 millóns de euros a investimentos.
Outros 14 millóns de euros destinaranse á promoción da cultura, a educación e ao Museo de Pontevedra; preto de 20 millóns a conservación e mantemento de estradas, e 2,4 millóns a impulsar un dos sectores clave da economía pontevedresa, como é o turismo.
Estas e outras liñas de actuación serán as que expoña o presidente da Deputación, Rafael Louzán, ante os membros da Comisión de Economía, Facenda e Orzamentos. Louzán será o primeiro dos catro presidentes en comparecer e a el seguiranlle os de Ourense, A Coruña e Lugo.