O primeiro tren refrixerado de mercadorías que conectará os portos de Alxeciras e Marín entra este mércores en servizo. O convoi transportará unha carga de peixe conxelado cada semana.

Será o primeiro transporte destas características que circule entre Andalucía e Galicia. Os máis de 1.650 km de percorrido convérteno tamén no tren refrixerado que cobre unha maior distancia a nivel nacional.

A periodicidade deste servizo de transporte de mercadorías será semanal, cunha frecuencia en cada sentido, aínda que a compañía que contratou o servizo a Renfe Mercadorías non descarta ampliar a frecuencia deste tren.

A saída da terminal do porto de Alxeciras prodúcese os mércores a última hora do día, e o regreso desde a terminal do porto de Marín está programado para os sábados a media tarde..

Renfe Mercadorías e o cliente ao que presta este servizo comezaron as viaxes de proba no mes de decembro. Os bos resultados destes ensaios tradúcense nun tren de 21 vagóns, cunha lonxitude total de 290 metros. Estes trens, tamén denominados  reefer, son trens de mercadorías que transportan a súa carga en contedores refrixerados.

O tren de mercadorías Alxeciras-Marín vai equipado con dous xeradores, un en uso durante todo o percorrido, e o segundo preparado para poñerse en funcionamento no caso de que fallase o primeiro. Os vagóns reciben alimentación dese xerador a través dun sistema de cableado que percorre todo o tren, asegurando así unha refrixeración homoxénea e constante que garante o transporte da mercadoría en óptimas condicións.

Na actualidade, o transporte de mercadorías por ferrocarril sitúase ao redor do 18 % en Europa, mentres que en España apenas supera o 4 %. As cifras avalan o transporte por tren como o medio máis sostible por unidade transportada xa que é o menos contaminante en materia de emisións. A modo de exemplo, o transporte de mercadorías por estrada xera unha cantidade de emisións de dióxido de carbono nove veces superior á xerada polo tren. A tendencia a nivel europeo sinala o camiño cara a unha mobilidade máis respectuosa co medio ambiente, na que o ferrocarril é un actor chave, explican desde a empresa Renfe Mercadorías.