En tres meses finalizarán as obras do novo colector entre Pastoriza e Picotes
Por Redacción
Durante esta semana, operarios da empresa EC Casas traballan na creación do novo colector situado entre Pastoriza e Picotes. Trátase dun proxecto destinado a dotar dun novo sistema de saneamento a esta zona do rural de Marín.
O prazo de execución é de tres meses, segundo anunciaba o concelleiro de Medio Rural, Pablo Novas, este martes durante a súa visita a esta contorna, acompañado de representantes da empresa adxudicataria dos traballos.
O investimento previsto ascende a case 159.000 euros e será financiada polo Concello con cargo ao remanente de tesourería.
Con esta infraestrutura, o Concello quere terminar cos problemas que se xeran desde hai anos debido ao mal funcionamento da depuradora de Pastoriza, que será clausurada. O goberno local decidiu iniciar este proxecto despois de reunirse coa veciñanza da zona e acordaban eliminar a depuradora actual xa que resulta ineficaz, segundo os informes técnicos.
Os traballos inclúen unha nova canalización que, segundo Novas, "permitirá prestar este servizo con calidade para os veciños e veciñas de Ardán". O novo colector entraría en funcionamento no mes de abril, se se cumpren as previsións municipais.