Cinco detidos dun grupo organizado relacionado con roubos en naves industriais de Arousa e O Salnés
Por Redacción
A Garda Civil de Cambados detivo os cinco integrantes dunha organización que se dedicaba a cometer roubos con forza en naves, polígonos industriais e terreos agrícolas.
Entre os delitos cos que se lles relaciona encóntranse varios roubos de cable eléctrico en polígonos industriais e canteiras de Caldas de Reis e Meis, de material de cociña nunha nave de Vilagarcía e varios roubos de motores e ferramentas en naves agrícolas e terreos na zona do Salnés. Tamén se lles atribúen subtracción de gasóleo de naves industriais e vehículos e de ferramentas e material nunha empresa de cristalería de Caldas.
Os detidos, dous de nacionalidade española e tres de nacionalidade romanesa, operaban de xeito organizado, segundo informa a Garda Civil, desprendéndose do material roubado enviándoo a Romanía ou transportándoo ata chatarrerías situadas en Portugal.
O modus operandi consistía, principalmente, en cometer os roubos e ocultar o material subtraído en zonas de monte, pouco transitadas e situadas preto do lugar no que se cometían os asaltos.
Tras ocultar o material, cubríndoo con ramas e maleza, os delincuentes regresaban ao seu domicilio para posteriormente volver cos compradores que se facían cargo da mercadoría.
Nos últimos días o axentes realizaron dous rexistros en vivendas de Cambados e Dena, intervindo diversos efectos entre os que destacan cable e bobinas de cobre, material informático, caixas de ferramentas, caladoras, amoladoras, radios de vehículos, emisoras de radio, motores eléctricos, bombas de rego, aspiradoras e gatos hidráulicos.
Os detidos foron postos a disposición do Xulgado de Instrución número 1 de Cambados, que decretou a súa liberdade provisional con cargos.