Unha campaña esterilizará todas as colonias de gatos abandonados da cidade
Por Redacción
A Concellaría de Sanidade Animal, as asociacións Palleiros e Difusión Felina e un grupo de voluntarios veñen de poñer en marcha unha campaña de esterilización de gatos en distintos puntos da cidade con obxectivo de poder rematar o ano cuns 100 gatos abandonados esterilizados.
O método de traballo consiste en abordar colonia a colonia todos os grupos de gatos que residen en Pontevedra. A maiores desta campaña, a Concellaría volve chamar á concienciación cidadá para evitar o abandono dos animais e adoptar as medidas que sexan precisas para controlar as camadas.
O concelleiro do ramo, Miguel Filgueira, sinala que aínda que os fondos que hai para este tipo de programa son limitados, comezan a verse os primeiros resultados da campaña, ao notarse a contención da natalidade nas colonias nas que se está a actuar.
A actuación comezouse a programar na primavera, pero os traballos máis importantes de esterilización estanse a desenvolver nestes últimos meses do ano e terán continuidade en 2014.