Dúas familias enfróntanse con paus e machadas por un axuste de contas por un accidente de tráfico
Por Natalia Puga
Un axuste de contas derivado dun accidente de tráfico ocorrido hai uns días está detrás dunha pelexa multitudinaria rexistrada ao mediodía deste luns en Vilagarcía de Arousa.
Así o indican fontes policiais confirmadas por PontevedraViva. Segundo indican, na liorta víronse implicadas dúas familias, unha dela armada con paus e machadas.
Nun momento do enfrontamento, un home recibiu un machadazo na cabeza e tivo que ser trasladado a un centro médico, onde recibiu varios puntos de sutura. Xa recibiu a alta médica.
A pelexa produciuse sobre as 14.30 horas deste luns na zona de Rubiáns, en Vilagarcía, e a última hora da tarde aínda non se produciu ningunha detención. De momento, os policías están a tomar declaración aos implicados e realizando outro tipo de xestións para pescudar todo o ocorrido.
Ata o lugar dos feitos desprazáronse axentes das policías Local e Nacional, así como servizos médicos.