A ciencia con nome de muller volverá difundirse a través do segundo ciclo Aida Fernández Ríos
Por Redacción
Chega a segunda edición do Ciclo Aida Fernández Ríos, con dez charlas en formato webinario e semipresencial para adultos e cinco conferencias en centros educativos. Este martes, a presidenta da Deputación Carmela Silva acompañada por Juan Lema, presidente da Real Academia Galega de Ciencias (RAGC), e pola investigadora Alicia Estévez, vicepresidenta da institución científica e coordinadora do ciclo, presentaban o programa que volverá tocar temas que axuden a fomentar o interese por cuestións científicas entre a poboación tanto adulta como escolar.
Os máximos dirixentes de ambas as institucións manifestaron a boa sintonía entre os dous organismos para fomentar tanto o papel da muller como o da ciencia trasladando esa mensaxe á cidadanía.
Os relatorios para adultos comezarán o 29 de abril, en formato webinario e semipresencial con streaming. A catedrática de Ciencias de Materiais da Escola de Enxeñería Industrial da Universidade de Vigo Carmen Pérez e Jesús Gago, investigador do Instituto Español de Oceanografía no Centro Oceanográfico de Vigo, analizarán a contaminación das augas por microplásticos e como está a incidir tanto no medio mariño como na sociedade.
O 6 de maio será a quenda de Bruno González Zorn, un catedrático de Microbioloxía da Facultade de Veterinaria da Universidade Complutense e de Carlos Diéguez, catedrático de Fisioloxía do Centro de Investigación en Medicina Molecular da Universidade de Santiago. Os dous ofrecerán detalles sobre as denominadas pandemias silenciosas en relación á resistencia aos antibióticos e a obesidade.
Beatriz González López-Valcárcel, catedrática de Métodos Cuantitativos en Economía da Universidade das Palmas e Xavier Labandeira, catedrático de Economía na Universidade de Vigo, serán os protagonistas o 27 de maio para ofrecer a súa visión sobre o cambio climático e a saúde en materia económica, centrando o tema na covid-19.
A relación entre as mulleres e a ciencia chegará o 3 de xuño grazas á doutora en Bioloxía pola USC, Xoana Pintos, especialista en estudos de xénero, que destacará a figura da médica e xenetista Jimena Fernández de la Vega; a quen a RAGC nomeou Científica Galega do ano 2021. Durante a sesión tamén se realizará unha descrición sobre a figura de Aida Fernández Ríos.
Durante o xoves 17 de xuño, Minia Manteiga, catedrática de Astrofísica na Universidade da Coruña, ofrecerá unha exposición sobre os exoplanetas e a detección de vida fose do sistema solar. Por último, o xoves 1 de xullo, Marta Lores, catedrática de Química Analítica da USC, encargarase de explicar a vinificación sostible.
O prazo para inscribirse para participar nestas charlas gratuítas atópase aberto na páxina web da Deputación de Pontevedra. As persoas asistentes recibirán despois un certificado.
O segundo bloque de conferencias levará a cabo en centros de ensino da provincia de Pontevedra, que seleccione a Deputación. A intención é concienciar ao alumnado de que tanto as mulleres como os homes teñen a mesma capacidade e poden chegar a alcanzar os obxectivos que se propoñan en relación coa actividade científica. Tres docentes das Universidades galegas ofrecerán explicacións sobre temáticas atractivas relacionadas coa revolución alimentaria, a intelixencia artificial ou as bacterias comeplásticos.
Tanto Alicia Estévez como Juan Lema asinaron no Libro de Honra da Deputación Provincial por invitación de Carmela Silva, que destacou a importancia de que quede constancia do seu paso na historia da institución provincial.